09‏/07‏/2019

رسومات فواكه للتلوين



صفحات رسوم فواكه للتلوين








كريم من تجربتي لتجنب تشققات الحمل





يمكنكم زيارة صفحة الانستقرام للحصول على معلومات ومقالات وتجارب منوعة

pregnants_and_mothers_of_arab


أكثر ما يقلق الحامل من الناحية الجمالية هو التشققات، على الأقل أنا كنت قلقة جدا من هذا الموضوع

ح اكتب بالعامي أحسن ههههههههههه

المهم، بنت خالتي جربت كريم خلال حملها وقالت انها استفادت منو وما صار عندا
تشققات أبدا أبدا
فقررت أنا كمان وقت حملت انو جربو،

طبعا كنت خايفة انو ما يكون هالشي صحيح

بلشت الاستخدام من نهاية الشهر الثاني من الحمل وأول شي صرت ادهن مرتين باليوم
ضليت هيك لمدة شهر
بتدهنوا منطقة الصدر، البطن الخصر من قدام ومن ورا، الافخاد والورك

بعدين صرت ادهن مرة باليوم وايام انسى لمدة ثلاث أشهر


هو التعليمات ع الكريم: مرتين باليوم من الشهر الثاني لمدة شهرين أو ثلاث أشهر

وهيدا هو الكريم



أنا موجودة بالبحرين اشتريتو من صيدلية رويان، بغير بلدان بظن بتلاقوه بالصيدليات الكبيرة





اوبعدين صرت امرار حط زيت جوز الهند وخاصة باخر شهر
لان كنت خايفة ههههه


والحمد لله ما صار عندي تشقق أبدا غير بمنطقة الثدي من الاسفل لان ما دهنتها بالكريم 
ما كنت عارفة انها بتشقق

من هيك أول شي قلتلكن ادهنو الصدر

وفي هيدا الكريم من تجربة صديقتي



13‏/11‏/2017

كتاب نداء الملاك للكاتب غيوم ميسو - رواية



رواية نداء الملاك للكاتب غيوم ميسو

  في هذه الرواية نعيش أجواء المغامرة الجريمة والتسرع، يبدو أسلوب الكاتب في هذه الرواية مختلف قليلا عن غيرها من الرويات السابقة له كرواية فتاة من ورق او لأنني أحبك، إذ طغت في هذه الرواية أحداث العنف....

قرأت الرواية بترجمة حسين عمر يؤسفني انها ترجمة سيئة تحوي الكثير من الأخطاء وتحتاج لمراجعة.

ما يزعجني في بعض الروايات هو وجود تفاصيل لا داعي لها وتبعث على الملل لقد تخطيت عدة مرات بضعة أسطر لأتجنب قراءة تفاصيل لا داعي لها في هذه الرواية...

فكرة الرواية راقت لي، ولكن ما استغربه هو سرعة استعداد مادلين (الشخصية الرئيسية) للنوم مع الأشخاص بغية حصولها على معلومات، وما كرهته أيضا هو الإختفاء المفاجىء الذي استبعدته الرواية في اخر اجزاء لخطيب مادلين رافيئل. ماذا حل به؟ لماذا تناساه الكاتب؟ ولماذا انجرفت مادلين بسرعة نحو الشيف؟ 

نصاب بالحيرة والاستغراب ببعض الأحداث، فرافئيل الذي ظن انه تعرض للخيانة، نراه فجأة يقع بحب مادلين ويقيم معها علاقة سريعة مع أنه يعلم أن زواجها قريب!!!!

ستشعر أيضا بالحيرة من كثرة تنقل الشخصيات من بلد الى اخر، وذلك فقط من أجل قضية كان يفترض انها انتهت منذ عامين...
------------------------------------------------------


عما تتحدث الرواية؟

الرواية تتحدث عن شخصين التقيا بفعل الصدفة بسبب تصادم حدث بينهما وتبادلا هاتفيهما بلا معرفة منهما، وتوالت الأحداث الى وصلا لأشخاص وأحداث تربطهما معا رغم وجودهما في بلدين مختلفيين..

مادلين فتاة انجليزية كانت شرطية شرسة واصيبت باحباط شديد عند توليها لقضية دفعتها لمحاولة الانتحار وبعدها أصبحت بائعة زهور في فرنسا.

جوناثان شاب فرنسي، كان يملك مطعما في سان فرانسيسكو ويحظى بشعبية كبيرة متزوج ولكنه خسر كل شيء عندما علم بخيانة زوجته والتي سنكتشف لاحقا حقيقتها اثناء القراءة.


29‏/10‏/2017

للأطفال، لعبة التطابق الأرقام والأعداد

هالنشاط منيح للاطفال ت يختبرو معرفتهم للأرقام والأعداد

طبعا وسيلة التعلم إلها تأثيرعلى مدى استيعاب الطفل للشي وكل م لقاه فيه تسلية ومرح كل ما حب هالشي اكتر.

الأدوات:
- عيدان خشب او ملاعق بلاستيك او ايا شي بتلاقوه مناسب
- اقلام ملونة

الطريقة:
بتكتبو الارقام من 1 الى 10 على العيدان متل بالصورة
وبترسمو اشكال مختلفة يتوازو مع الاعداد، يعني مثلا عنا عود رقم 6 منرسم على عود تاني 6 قلوب.. الخ 

بس نخلص منخلطن ببعض ومنطلب من الطفل يقسمهم قسمين قسم للأرقام وقسم للأشكال.

وقت يخلص تقسيم منطلب منو ينسق كل رقم مع العدد الصحيح :)



28‏/10‏/2017

تمارين لتقوية عضلة العين والمحافظة على نظر سليم

بهالأيام صار في استخدام كتير للشاشات، وهالشي بيخلي العين تضعف اكتر، هيدي التمارين مخصصة لتقوية عضلات العيون..

التمارين ما بتحسن نظرنا، بس بتساعدنا نحافظ على صحة عيونا ت م نفقد نظرنا,,

طبعا لازم نعمل فحص نظر عند دكتور مختص، ونتأكد من سلامة عيوننا، لنكون واضحين هالتمارين مش ح تساعد اللي عندهم قصر نظر أو بيرمشو كتير، او عندهم تشنج بالعيون، أو شلل بالعضلة لان هالحالات بتطلب معالجة من قبل دكتور مختص..

بالنسبة للأشخاص اللي عندهم مشكلة بالقرنية ومسووين عملية بعيونهم او اللي عندهم اعتام بالعدسة الافضل تجنب هالتمارين.

أول شي ح نبلش بكيفية التحضير لهالتمارين:
عشان نحصل على نتيجة منيحة لازم اول شي نتأكد من اضاءة المطرح اللي نحنا فيه، 
ما نعتبر هالتمارين وكأنهم وظيفة مجبورين فيها بالعكس نعمل التمارين ونحنا مبسوطين واتذكرو تضلو مبتسمين خلال التمرين،
لان الابتسامة والتعبير الايجابي بينعكس على عيوننا كمان.

وقبل م نبلش مناخد نفس عميق منطلعو منبتسم ومنبتدي



تاني شي التمارين:

1- فوق و تحت: منتطلع لفوق ومنركز بالشي الموجود منرجع منتطلع لتحت وكمان منركز بشي موجود تحت، منكرر 5 مرات منرجع منريح عيونا شوي ومنتطلع لقدامنا عادي ومنكرر العملية 3 مرات.

2- شمال ويمين: كمان نفس الشي منتطلع لجهة اليمين للاخر ومنركز بشي معين منرجع للشمال منكرر 5 مرات، منرجع منريح نظرنا ومنكرر العملية 3 مرات.

3- خط مائل:اول شي منركز نظرنا قدامنا منرجع منحرك البؤبؤ لجهة الشمال ومنتطلع للزاوية التحتانية وبعده خط مائل لزاوية اليمين ومنتطلع يمين ومنرجع لقدام وهكذا، منكررا 5 مرات ومنريح نظرنا ومنعيد العملي 3 مرات.

4- خط متعرج: منتطلع قدامنا ومنركز ومنبلش نحرك عيونا بشكل متعرج فوق وتحت فوق وتحت ومنكرر نفس الشي.



5 و 6- رقم 8 بالانجليزي: هيدا التمرين منيح لترييح العين وتحسين الرؤية،
اتخيلو هالحرف قدامكن بطول الحيط او أكبر وبلشو بعيونكم ارسموه شوي شوي بالشكلين العامودي والافقي.كرروه مرتين وارجعو عيدو بالاتجاه العكسي.


7- دائرة: اتذكروا دايما ضلو مبتسمين :)
جلسو قعدتكم واسترخوا، شوي شوي اتطلعو ناحية الشمال وبالهدا ارسمو دائرة بعيونكم باتجاه عقارب الساعة،كررو 5 مرات وريحو وارجعو كررو العملية بس هالمرة بعكس عقارب الساعة. كررو التمرينين 3 مرات.

8- دوامة: كمان اقعدو جالسين واسترخو خدو نفس والابتسامة طبعا، وحركو عيونكم بشكل دائرة متكرر متل الشكل بالصورة.



9 و10- شكل الراصور او السبرينغ: اقعدو جالسين استرخو وابتسمو ونفس الشي حركو عيونكم متل الشكل كررو 5 مرات ريحو نظركم وكررو العملية 3 مرات.

ثالث شي التركيز على شي قريب وعلى شي بعيد:

1- اقعدو على كرسي او حتى اوقفو حد الحيط، لازم يكون في غرض قريب منكم شي 30 سنتيمتر.(لوحة، تلفون، ورقة، قلم الخ...)

2- ركزو نظركم بالغرض القريب واتطلعو بكل تفاصيلو.

3- وهلء ركزو نظركم على شي بعيد عنكم وكمان اتطلعو بالتفاصيل.

4- ارجعو بنظركم للغرض القريب..

5- كررو هالشي 5 مرات ارجعو ريحو نظركم وكررو 5 مرات.

رابع شي انهاء التمارين بعملية استرخاء:

افركو ايديكم ببعض عشان يصيرو دافيين، غمضوا عيونكم وحطو ايديكم بالهدا عليهم اتنفسوا بعمق واسترخو لدقيقة او دقيقتين.

وخلص بتمنالكم نظر سليم وصحة وعافية :)




#تمارين #عيون #صحة  #مساج #فحص-نظر #العيون




LinkWithin

Related Posts Plugin for WordPress, Blogger...